Ընդհանուր տեղեկություն

ԵՀԽ Հայաստանյան Կլոր սեղան հիմնադրամը (ՀԿՍ) հիմնվել է Հայաստանյայց Առաքելական Սուրբ Եկեղեցու և Եկեղեցիների համաշխարհային խորհրդի նախաձեռնությամբ և Հայ Կաթողիկե և Հայ Ավետարանական եկեղեցիների մասնակցությամբ: Կլոր սեղանը սկսել է իր գործունեությունը 1996 թ.-ին (գրասենյակը հիմնադրվել է 1997 թ.-ին) և այժմ գործում է Ն.Ս.Օ.Տ.Տ. Գարեգին Բ Ծայրագույն և Ամենայն Հայոց Կաթողիկոսի հովանու ներքո:

Սերտորեն համագործակցելով հայ եկեղեցիների, տեղական հասարակական կազմակերպությունների, եկեղեցահեն կազմակերպությունների հետ՝ ՀԿՍ-ն նպատակ ունի համատեղ ուժերով անդրադառնալ երկրի մի շարք հիմնարար սոցիալական և տնտեսական խնդիրներին: 2004թ. նոյեմբերին ՀՀ Արդարադատության նախարարության կողմից ՀԿՍ-ն Եկեղեցիների համաշխարհային խորհրդի հայաստանյան միջեկեղեցական բարեգործական Կլոր սեղան հիմնադրամ անունով գրանցվել է որպես ինքնուրույն իրավաբանական անձ:

Մենք կարևորում ենք քրիստոնեական հիմնարար արժեքների՝ սիրո, հավատի ու հույսի, գործուն դրսևորումը: Հիմնվելով այն Աստվածաշնչյան համոզմունքի վրա, որ մարդիկ ստեղծվել են Աստծո պատկերով ու նմանությամբ և պետք է արժանանան հավասար վերաբերմունքի, մենք մեր աշխատանքում առաջնորդվում ենք հետևյալով՝

• Պահպանել քրիստոնեական, համամարդկային, ազգային և մշակութային արժեքները,
• Հարգել մարդու իրավունքները և հիմնարար ազատությունները,
• Հոգածություն ցուցաբերել հանրության սոցիալապես խոցելի խմբերի կարիքների նկատմամբ,
• Պահպանել շրջակա միջավայրը,
• Կարևորել հաշվետվողականությունը, թափանցիկությունը և մասնակցայնությունը, փոխվստահությունը, անկողմնակալությունը և հետևողականությունը,
• Գրանցել գործունեության բարձր արդյունավետություն և ազդեցիկություն,
• Իրականացնել մատուցված ծառայությունների, ստացված արդյունքների և ազդեցության շարունակական գնահատում և փոփոխություններ՝ ըստ անհրաժեշտության,
• Խրախուսել թիմային աշխատանքը և համագործակցությունը: